عبر الخطوة
نوصيك يا سامع لكلام
فهم معانيه ؤ روى
غزل من حروفو مقام
لفهامة ف المخ نخوة
لبس الحكمة سلهام
غربل ؤ خود الصفوة
خلي عقيلك رسام
صوت لقليب سقوة
دير للنفس لجام
حميها من سموم الشهوة
قبل لا تزيد للقدام
عبر يا خليلي الخطوة
النفس السارحة بلا لجام
ضحية لصنانر النزوة
علمها تتقن الصيام
تجني من بحاير القدوة
كون ف الثباثة علام
لا تركب لهبال صهوة
عام يرميك لعام
تسرقك ليام سهوة
تصير بالفتنة مجذام
مملوك لسلطان النشوة
تبيع لحلال ب لحرام
تضيع ف ركايزك القوة
ما ينفع ف لحالة فطام
ما تنفع نصيحة و لا فتوى
تغرق ف دموع لندام
بنار الحسرة تتشوى
تجني سوء لختام
تلبس الضيم كسوة
ؤ ها كلامي من جوهر لنظام
شعاع نورو صحوة
تحزم بمعانيه تحزام
و طرق بيبان النجوة
عبد الجليل خالدي
ليست هناك تعليقات:
إرسال تعليق