فلسطين/بقلم/ الزجال/محمد البراقي الحسناوي

بعنوان فلسطين 

يَا عَشْرَانِي يَا الشَّرْفَة

هَاذْ  الزْمَانْ رَاهْ بْلاَنِي

رْوَاوْ  لَكْلاَمْ  شَرْبُو الَمْعَانِي

حْرُوفِي سَكْتُو

حَتَّى  عْيَاوْ أُبَاحُو..

شَهْقَتْ الرُّوحْ

قَلْبِي وَجْوَارْحِي

عْلَی الخُّوتِي  نَاحُو

شَافُو الْعُدُو

هَازْ عْلَى لَوْلاَدْ سْلاَحُو (ه)

وُعْلَى الْمَسْجُونْ 

اللهْ يَطْلَقْ  سْرَاحُو (ه) 

 

مَا حَسِّيتْ

بَدْمُوعِي  عْلَى خْدُودِي

 سَاحُو

مَابْكِيتْ عْلَى الَخْيُامْ 

بْكِيتْ  عْلَى  فِلِسْطِينْ

وَعْلَى أَرْوَاحْ الشُّهَدَا(ء)  

للِّي رَاحُو...

حَوَّمْ حْمَامْ السَّلاَمْ

فُوگْ لَرْسَامْ

رْمَاوْهْ العَدْيَانْ  بَالسْهَامْ

تْكَسَّرْ جْنَاحُو (ه)

سْكَتْ عْلَى مَابِيهْ 

بَالصْبَرْ  كَمَّدْ جْرَاحُو(ه)...

يَا عَشْرَانِي يَا الشَّرْفَة

هَاذْ  الزْمَانْ رَاهْ بْلاَنِي

كُلْهَا تَيْعَيَّطْ عْلَى صُلاَّحُو(ه)

فُوكَاشْ يْبَانُو خْيُوطْ  الَفْجَرْ 

نْهَارْنَا  يَطْلَعْ  صْبَاحُو!!!

15/12/2019

بقلم محمد البراقي الحسناوي