الكلمة حكمة و الگانة جنان
يا حارث لقصيدة ختار الزريعة
غلة حروفك عند لحصاد تبان
تطرب لودان بنغام رفيعة
لقصيدة رسالة يتقنها الفنان
ما تعگر خاطر ما تخصر طبيعة
تشفي المعلول ترضي الرحمان
ما تروم عيب ما تنافي شريعة
لكلام معنى حروفو بيان
يسلب يا صاح لوذان السميعة
الحيرة اللاكحة يرويها كيسان
ف عنگ لعقول الراجحة وديعة
خليها شايخة حلوة ف اللسان
ف لعقول معاني ؤ فلگلب ربيعة
خليها وافية مساگدة ميزان
ثابتة من ضرع الرزانة رضيعة
من حوض لكلام خوذ المزيان
بلية البوح عشق ؤ ليعة
كون عللام للجودة ربان
تفادى خيي التافهة لوضيعة
لكلام المحبوك فايح ريحان
يفاجي الغمة يمسح الدميعة
لونو باهي ورود بلعمان
النفس لحضانو راها طميميعة
ديرو وسام و الحكمة عنوان
نوارو شايعة عل لفهام سطيعة
سلطان لمجامع حجة و برهان
بينو ؤ بين السفالة خصام و قطيعة
بين الناس همة تدرك الشان
الراس مرفوع السومة رفيعة
گوايلك معاني تروي لذهان
ف رحبة الحكمة تحلى البيعة
طرزها بالصدق لبسها قفطان
لحروف الوازنة للرجلة شفيعة
الكلمة صهوة يلزمها فرسان
على سروجها خيي تحلى التربيعة
عبد الجليل خالدي. 8/12/2019
ليست هناك تعليقات:
إرسال تعليق