حلمي
شحال تسنيتو يكبر
يضحك ف وجهي ؤ يغاغي
يداوي الخاطر المقموش
***
نراري على وعدي و نحزر
ل سعدو يهون تمراغي
ذاك حلمي ولد لفشوش
***
مشداگ نشوفو يگرگر
ل نشاد فرحو صاغي
يملى بلحانو الحوش
***
زرعتو ف فدان الصبر
صگتو بلجام دماغي
نويتو شايخ عروش
***
عروش مليانة ثمر
نجني الغلة اللي باغي
تتفاجى غمة ف لگاشوش
***
حلمي وگيد لعمر
ف زمان اليأس طاغي
ف گانة الرجا منقوش
***
ما فتر و لا عياه السفر
درتو للحسرة دباغي
سرحتو سريح الببوش
***
ف جلايل عنادو يتخنتر
رسمتو و الأمل صباغي
علمتو ما يروم للتوش
***
ساعات نفسي تسكر
بسحر الصورة تلاغي
يطلع اللون مغشوش
***
علمتو يسمر للزهر
الوجبة رحيلها ضاغي
كفنها بين الشوفة و الرموش
***
درتو ل ليلي فجر
يشطن ب حسو فراغي
سلطان سوايعي ما منوش
عبد الجليل خالدي 30/11/2019
ليست هناك تعليقات:
إرسال تعليق