....وليت وزير.....
نعست وشبعت شخير
وليت نحلم حلم ملاوط...
...
خير و سلام وليت وزير
وبدلت عليا دوك الشراوط...
...
ولى عندي طنوش كبير
وكرشي منفوخة شبعانة كواغط...
...
سكنت فيلا ما بقاش القصدير
وما بقيت مع الوقت نتلاوط...
...
حيدت عليا الجلابة و الحندير
ولات الطوموببل ما نكسب براوط...
...
ولى عندي الشيفور والشويفير
وبدلت صحابي مع من كنت نتزافط...
...
وليت نعرف دهن السير يسير
ونسيت يامي وفين كنت نتزاوط...
...
وخا خايناني اللغة والتعببير
درت حمية عندهم زراوط....
...
شفت لفقير والزمان شرير
وشفت المسكين مع حالو يتخابط...
...
شفت لي يغوت ويناشد بالتغيير
على لي كلاو الهبرة وخلاو الجلافط....
...
دخلت القبة، نتسارى بلباس حرير
منو كوستيم ولرجلي الغالي من سبابط...
...
تعرفت على هذا صغير وهذا كبير
وانا ما موالف من كلامي ندير مشاحط....
...
ما قدرت ننسى الاصلاح ويبقى تجرجير
وعلى حق الناس نولي غادي عافط...
...
بان لي ينهب و يحوز كموس كبير
وشي فرقوه وشيطوا فيه تلاقط...
...
ضربتني الفيقة ما عندي ما ندير
لقيت راسي بجنب العتبة مزاوط...
...
نضت ل تحدادت ننفخ الكير
قلت شلا غرايب بين كومبليات وكرافط...
..
........أحمد الناصري.....
ليست هناك تعليقات:
إرسال تعليق