تدوينتي بمثابة دعوة انتباه لبعض الآباء بالاصغاء لأبنائهم وتتبع مشاكلهم و مساندتهم وخاصة في الفترات الحرجة من أعمارهم كي لا تكون النتيجة كارثية.
صرخة ابن
جايني ليوم تحاسب
ناوي تحك عل الضبرة
بلسان ماضي تعاتب
موريني العين الحمرة
تلومني فسعدي الخايب
تسقيني سموم الهدرة
من حالي فڭعان ؤ غاضب
زايدني ف همومي جمرة
طاعتي ليك بويا واجب
رباية ميمتي الحرة
ما نعلي عين على حاجب
ما نخطى صواب العشرة
جيتك لسماعي راغب
حاول تفهمني مرة
عييت و الله غالب
الظروف عصرتني عصرة
ماني ذليل ؤ لا عايب
ماني عديم القدرة
من صغري بويا نحارب
تحديت شحال من عثرة
غيابك علمني مصايب
لا حيلة نفعتني و لا عبرة
مشيت فطريق سايب
بالطيش حالي تعرى
طريق وعدو كاذب
شرور لثامها مسرة
بين اللوايع نفسي تتجادب
حماقي ينغل نعرة
نبكي من زهري نادب
الضياع جنيتو ثمرة
عبدالجليل خالدي
ليست هناك تعليقات:
إرسال تعليق