[ ]
//=الجيد فالقوم جيد=//
÷÷÷÷÷÷÷÷÷÷÷÷÷÷
الجيد جيد كيف عادتو يبقى اكريم..
الرعواني هاذيك عادتو يبقى بخيل..
كيف اتصاحب صاحب العقالة..
صاحب الفاهم فقيه ولا علامة..
لغشيم دير بينك وبينو اشبر.. ما ينفع ما يضر وقت الحاجة..
ما يكتم ليك في صدرو سر
انت حداه هو يهضر فالضهر
كن سيدي كن مولاي..
كن مولاى بوسلهام..!
كن عارف وين غادية السفينة.. توقف ساهي فالشط تنادينا..!
دير فالسوق دورة تعرف اش جاري..
سول الغادي والماجي ايبات ايراري..
كن شفتي حالتهم يجريوا..
يجريوا دموعك بلا امجاري..
رجال كبار....فيهم صبيان.!
راكبين بابور موج بلا ربان.!
قزبونا حد الركبة مثل الجديان..
لحقوق تقسمت بينهم بلا ميزان..
ميزان اصكع اصكع ذاك الميزان..
لاعين شافت لا قلب حن يا رحمان..!
وين فلوس الفوسفاط وين التربان..؟
وين خيرات البحور ياك هما اثنان..؟
وين الطاقة وين الشمس وين الكهربا..؟
وين الصحرا وين الرمال وين البترول..؟
وين الصحة والذات كلها اعكاكزمخروبة..؟
وين السدود اولهم بين الويدان..؟
وين الاراضي فدادن و اطيان..؟
وين ضاعت كل الضيعات..؟ وين يا ناسي وين المال..؟
درت دورة رحت نعبر بقدامي.! دماوا قدامي يا ربي اقدامي..
هزيت عيني للسما زعما شاكي.. قوست عيني سرت انا انشعي..
خالية الارض...بانت كلها احفاري..
كبار الامة ذياب اتخطاوا لحفاري.. نصبوا الشراك نصبوها للدرارى..
السما حمرة دراوا لغبار بالمداري..
قلت اندير زردة تعرض عالاحزاب
يقدر ايكون شي باب..!
كل واحد جاب وراقو
كل واحد جاب اقرابو
التالف جاب علافة...!
كاين اللى احدر عينيه
عارف التراب ما ترابو
عارف الفوسفاط كافي
لكن اش ايدير فجيابو
رديتوني اغريب براني وانا فبلادي.. بصحتك خويا خد عمر كل اجيابك..
كيف اتدير ليه والليل اطويل..؟
اقصارت لهبال مازال طويلة !
مول الكربة قال رجعوا الخاوي..
عارف الدار واسعة و اعريضة.. ساسها مبني على رطام بدوزة..!
كثر الله في الاحزاب اوزاد فيها
شي خايف شي خاطف شي هارف
شي احكم عوج لحكام غضبوا عليه..!
شي يتلبد كالذيب يمكن ايعيطوا ليه..!
الامل فالماجي سلطانا زمامو بيديه..!
ان شاء الله ايعمروا لحباسات بيهم..!
ناخدو الاموراليوم بالحماس والجدية..!
تمشي القاطرة و اتلوح عباب التأخر..!
العابد عبد الرحيم: غشت 2017
""""""""""""""""""""""""""""""""""""
ملهمتي الفقيه بن صالح..
""""""""""""""""""""""""""""
ليست هناك تعليقات:
إرسال تعليق