النية مصگومة
لعقل حاير و الخاطر مصدومة
ل قاضي الغيرة شكاتني النظرة
ف جلايل العار داتنا النومة
المخ معلول و الگلب حجرة
ما بقات تقلقنا كلمة حشومة
عل لوجوه رسمنا الضحكة الصفرة
العربي تبهدل طاحت السومة
ما بقى ف النخوة غير القشرة
صفوفنا حولة و علامن اللومة
صرنا عبيد سلطان الحگرة
الراس محني و الطاعة ملزومة
سرنيفة الخوف ف لعناگ مزيرة
عين لعدو شايفانا دمدومة
بعنا الكرامة ؤ فكينا الجرة
ف الذل يا صاح حلات العومة
الخوف سلطان و الصمت سترة
ضحات نفوسنا عل لهروب مفطومة
اللسان بالتبرير شبعان هضرة
غاب الضمير الساكن ف لجمجومة
مات الگلب ؤ هانت العشرة
غزة مغبونة من الخاوة محرومة
حالها حال المگطوع من شجرة
بين الخو ؤ لعدو عايشة مضيومة
شي مادها للذبيحة ؤ شي مضي الشفرة
الغيرة هبات و النية مصگومة
ما بقات تنفع ب عوين و لا نصرة
صهيون نازل نزلة مسمومة
شاد لخناق ؤ مزير الوترة
بالسلاح الفتاك غزة مرجومة
على خرابها لعدا جارية مشمرة
لرواح مزهوقة ؤ لمباني مردومة
الضرب قوي و العين حمرة
لعهود ؤ لمواثق بالحيف مزطومة
يا وعدي تغصبات الأرض الحرة
بوعود السلام الخاطر مگهومة
ف جرح الإسلام تحكات الضبرة
شعارات مفخة بالخبث ملغومة
تحلب العربان حليب البگرة
حيلتنا دموع ؤ خدود ملطومة
بعنا الغالي رخيص يا حسرة
تمنيتنا بلاشتات أمة ملمومة
للعالم وحدتنا تكون عبرة
عبد الجليل خالدي22/11/2019
ليست هناك تعليقات:
إرسال تعليق